Sólheimasandur lokaður!

Landeigendur á Sólheimabæjunum í Mýrdal hafa tekið þá ákvörðun að loka Sólheimasandi fyrir allri umferð, bæði vélhjóla og bíla.  Ákvörðun um þetta var tekin á fundi landeigenda laugardaginn 17.maí, og getum við hjólamenn kennt sjálfum okkur um að svona er komið.

Bændur á Sólheimabæjunum hafa undanfarin ár verið sérlega liðlegir til að veita hjólamönnum leyfi til að hjóla á sandinum og hefur umferð hjólamanna oft verið mikil.  Það hefur hins vegar verið skilyrði að hjólafólk hefði samband og fengi leyfi til að hjóla, og héldi sig neðarlega á sandinum þar sem engin gróður er og vindur og regn eyðir förum á skömmum tíma.

Okkur hjólamönnum hefur ekki tekist að fara eftir þessu.  Mjög mikil umferð hjólafólks hefur verið um sandinn undanfarið, í framhaldi af fréttaumfjöllun um hjólamann sem missti hjól í ánna Klifandi, en Klifandi markar austurjaðar svæðisins sem um ræðir.  Fáir af þeim sem hafa nýtt sér sandinn undanfarið hafa hirt um að láta vita af sér og hafa þess vegna ekki haft vitneskju um hvar mátti hjóla á svæðinu.  Afleiðingin er auðvitað sú að menn hjóla allsstaðar.  Þykir landeigendum nú nóg komið, sérstaklega eftir að einn þeirra gaf sig á tal við hjólamenn til að biðja þá að hjóla neðar á sandinum, utan gróinna svæða, og var svarað með skætingi.

Hliðum að Sólheimasandi verður lokað og settar upp merkingar um að öll umferð sé bönnuð.  Þessi ákvörðun verður hugsanlega endurskoðuð næsta haust.

 

Ólafur H. Guðgeirsson
Umhverfisnefnd MSÍ

Athugasemdir

[Hekla #336 (IP-tala skráð) 19.5.2008 kl. 23:13]

úff púff...  ekki gott.. 

ég var að hjóla þarna á annan í hvítasunnu með 5 öðrum...  ekki vissum við að það ætti að fá leyfi til að hjóla þarna...  við reyndar keyrðum alveg niður að læknum sem er við flugvélina og tókum hjólin af þar og hjóluðum beint niður í fjöru og vorum í brekkunum þar að leika...   en það hefði verið sniðugt að hafa skilti við hliðið þar sem stæði að það ætti að láta vita af sér... og kannski líka símanúmer þannig að það færi ekkert á milli mála í hvern ætti að hringja...  

mikil sorg að þarna meigi ekki hjóla meir... en ég er viss um að fleiri hafi ekki vitað að það ætti að láta vita af sér...  maður heyrir bara að það meigi hjóla þarna og fer þá þangað að hjóla... ekkert sem benti til þess maður ætti að láta neinn vita 

[Team Kawasaki, 20.5.2008 kl. 20:26]

Við skulum ekki örvænta, þessi ákvörðun verður vonandi endurskoðuð í haust.  Umferðin var bara orðin alltof mikil þarna og nauðsynlegt að bremsa þetta aðeins af.  Sjáum hvað setur í haust, hvort við finnum ekki leið til að stýra umgengni um svæðið.

Kanske rétt að segja frá því að ég er ættaður frá einum af þessum Sólheimabæjum og ég er þarna með aðra löppina - búinn að hjóla þarna í 32 ár, frá því að ég eignaðist skellinöðru......og ég er ekkert hættur að hjóla þarna, það þarf bara að vera skipulag á þessu.